Древнерусские летописи.

Для правильного отображения символов необходимо скачать и установить летописный шрифт

Киевская Летопись первой четверти XVII СТ.

[Український історичний журнал 1989, №2. — С.107-120; 1989, №5. — С.103-114.]

Начало Пєчєрскому манастыру

/661/ В лЂто SФ̃НФ [6559] постави Ярослав кн̃зь Лариωна митрополитом Руси на Стои Софєи в Києвє. Сєи прєждє почал копати пєчєру, послЂ єго Антонии ископал и всєлис в ню, и быст ωграда вєлика и до днєс.

Тогдыж пришли Г̃ [3] пεвци из Грєк из родом своим ^А.

В лЂто SФ̃ПВ [6582] прєставис Антонии, игумєн пєчєрскии ^Б. Бл̃гословил и мЂсто назначил на цр̃ков Пєчєр.

В лЂто SФ̃ξГ [6563] пришєд Изєслав, нача кн̃жЂти в Києвє, а Ст̃ослав в Чєрниговє, а Всєволод у Пєреясловли, а Игор у, Володимєри, а Вєчєслав у Смолєнску. При сих начат быти Фєωдосии игумєн пєчєрскии в Києвє.

В лЂто SФ̃ПА [6581] заложил игумєн Фєωдосии цр̃ков Пєчєрскую Стои Бц̃и.

В лЂто SФ̃ПВ [6582] прєставис игумен пєчєрскии Фєωдосии и положили єго в пєчєрє, ю ж бЂ сам создал. А на игумєнство бл̃гословил по собЂ Стєфана и просил кн̃зя Слава (!) ^В и сн̃а єго ГлЂба, жєбы нє дали ув обиду манастыря.

В лЂто SФ̃ЧЗ [6597] свщ̃єнна быст цр̃ков Пєчерская Ст̃ои Бц̃и. Того ж лЂта прєставис Иωан, митрополит киεвскии.

В лЂто SФ̃ЧФ [6599] прєнєсоша Фєωдосия ис пєчєры и положиша во цр̃кви Пєчєрскои во притворє на дєснои странє, идЂ жє и нинЂ лєжит, августа во ДІ̃ [14] дн̃ь. Прєнєсли єп̃скпи Єфрєм пєрєясловскии, Стєфан володимєрскии, Иωан чєрниговскии, Марин ¹ юрєвъскии, Антон порожскии ^Г. Того ж лЂта успє Иωан митрополит ^Д.

¹ Мурин? Мърин? (Іпатіївський літопис, ПСРЛ, т, 2, стб. 202).

В лЂто SФ̃ОГ [6573] пошол Ст̃ослав на Ростислава, Ростивжєслав (!) ωтступи кромє и убояс єго, но хотя против стрыєви своєму ωружиє поднят Ст̃ослав жє пришєд у Тмуторокан а посади сн̃а своєго ГлЂба и возвратис ωпят. Ростисслав (!) жє пришєд пак выгнал ГлЂба, а сам сЂл у Тмуторокани, и пришол ГлЂбъ пак ко ωтцу. В тоє ж лЂто Всєслав рат почал.

В сє ж врємя быст знамєниє на западє, звЂзда явис прєвєлика, /661зв./ имущи луча крывавыє, восходящє c вєчєра по западє солнечном, и прєбыст так З̃ [7] днєи. Сє ж проявляшє нє на добро. По сєм быст мєжисобица многа и нашєствиє поганых на зємлю Рускую, сия бо звЂзда бЂ яко кривава проявляющи кровопролитиє ^Е.

В си ж врємєна быст дЂтищ вовєржєн в СЂпомлъ ², єго ж вывлєкоша риболовє в нєводє, єго ж смотрЂхом до вєчєра и пак вовєргоша у воду у морє, быст бо у нєго на лици срамныи удовє, а иного нЂзє и казати срама ради. А прєд сим жє врємєнєм сл̃нцє прємєнис и нє быст свЂтло, но яко мс̃цъ быст ^Є, єго ж невЂигласии гл̃ют снєдєнну быти. Сия ж знамєния бывают нє на добро. Якож дрєвлє при Антиху [!] во Иєр̃слмє каючис по всєму граду прєз M̃ [40] дн̃єи являтис на воздусє, на конєх рыщущє во ωружиих златыє имущє ωдєжды и полки ωбоямы [?!] являются ωружиєм двизающимся. Сє ж проявляшє нахождєниє Антиωхово на Иєр̃слим. По сєм при Нєронє цр̃и в том жє Иєр̃слимє восия звЂзда во ωбраз копЂиныи над градом. Сиє проявляла нахождєниє рати ωт Рымлян. И пак быст при Устиянє цр̃и звЂзда восия на западє, испущая люча, ю ж прозываху блистаницу, а быст блистающи K̃ [20] дн̃єи. По сєм быст звєздам тєчениє c вєчєра и до утра и вси разумЂли падут звЂзды и пак солнцє бєз луны сияшє. По сєм бо крамолы чл̃вком и см̃рьт быст. Пак жє при Маврикєи цр̃и быст: жєна родила дЂтищє бєз ωчии, во чрєслєх: бЂ єму рибєи хвост прирослъ, и пєс родлъс ω S̃ [6]-ти ногах.

Во Африцє ж родилис двоє дєтєи, єдин ω Д̃ [4]-хъ ногах, а другии ω двох головах. По сєм жє быст при Констєнтинє Иконоборцы, сн̃є Лєωновє, тєчєнє звЂздноє быст на нб̃си, ωтторгахус на зємлю, и яко видЂли их, мнЂли кончину свЂту, тогда ж и воздух узнялся. В Сурии жє был трус вєлик зємли, рассЂлас Г̃ [3]-хъ поприщ и дивно из зємли им скагл̃шє /662зв./ чл̃чєским гласом проповєдающє нашєствиє язык, якож и быст, наидоша бо Срацыны на зємлю Палистинскую. Бо знамєния бывают на нб̃си и во звєздах или во сл̃нци, или птицами, или єтєром, чым нє добро бываєт, но сия знамєния бывают на зло или проявлєлиє рати, или гладу, или см̃рти ^Ж.

В лЂто SФ̃ЧS [6596] Всєволод ловы дЂял звєриныє за Вєшшєгородом. Внєзапу спал змии прєвєлик ωт нб̃си, и ужасошас людиє, и зємля стукнула, мнози слышали ^З.

В лЂто SФ̃ЧЗ [6597] прєнєсоша мощы ст̃го Николы из Мира во Барград ³ при цр̃и АлєксЂи и патриярсє Николє а при кн̃зи києвском Всєволоде.

В лЂто S̃Х-го [6600-го] быст прєдивно чудо у Полоцку, топот конскии чути и копыта видЂти в нощи по улицам множєство яко чл̃ци бЂси рищущє и во дн̃и являхус, и уязвляху людєи полоцких, и c того умираху. Ащє кто вылєзєт ис храми хотя видЂти, уязвлєн бываєт. И нєвидЂ.мо умираху во ωбласти их. В сиє ж врємена много знамєнии быша кн̃зєм, усобиица быша и нахождєниє иноплємєнник. Взяли Половцы град Трєпєсочныи Пєрєволок ⁴.

² СЂтомле? Ситомли? (так у ПСРЛ, т. 2, стб. 154). Сетомль (Сетомля) — річка під Києвом (ПВЛ. — Т. 2. М.; Л., 1950. — C. 374). У давньому Києві — притока Почайни на Оболоні; пізніше: 1) р. Юрковиця, притока Почайни; 2) один із ставків на Либеді, найімовірніше — Кадетський (XIX ст.) (Етимологічний словник літописних географічних назв Південної Русі. — К., 1985. — С. 155).

³ Бар-град — суч. м. Барі в Італії, куди були перенесені мощі Миколая, архієпископа м. Мир у Ліки.

⁴ По ПВЛ: «взята 3 грады: ПЂсоченъ, Переволоку, Прилукъ» (т. 1, М.; Л., 1950, с. 141). Ці три міста знаходились у Переяславському князівстві на кордоні з половецьким степом (там же, т. 2, с. 417, 445). Песчин (Піщане) — поблизу Переяслава-Хмельницького Київської обл., Переволока — в Прилуцькому р-ні Чернігівської обл., Прилук — сучасне м. Прилуки Чернігівської обл. (Етимологічний словник... — С. 97, 110 — 111, 113 — 114).

В лЂто SХ̃В [6602] приидоша прузи на Pускую зємлю августа КS̃ [26] дн̃я и поядоша всяку траву и жита и нє бЂ так слышанно во днєх пєрвых во зємли Рускои.

Тогдыж ХГ̃ [602] рок пак приидоша прузи августа КВ̃ [22] ^И и покриша зємлю, и бЂ видЂти страшно; пошли к полунощным странам.

В лЂто SХ̃И [6608] Володимєр Манамах заложил цр̃квъ Ст̃ыє Бц̃и у Смолєнску марта З̃ [7] на Срєдокрєстиє ^І.

Того ж лЂта быст знамєниє на нб̃си гєнваря К̃Ф [29], по Г̃ [3] дн̃и звЂзда ωсвєщающє всю нощъ.

В лЂто SХ̃ВІ [6612] быст знамєниє, стояло солнцє у кругу, а посрєди крєста сл̃нцє, а внЂ круга ωбапол д†сл̃нци, а над сл̃нцєм кромє круга дуга рогами на сЂвєр. /662зв./ Такжє и в лунЂ тоє ж знамєниє.

В лЂто SХ̃SІ [6616] быст знамєниє во Пєчєрском манастыри фєвраля АІ̃ [11], явился столпъ ωгнєнныи ωт зємли до нб̃си.

В лЂто SХ̃КВ ^Ї [6622] сЂл Володимєр Манамах на вєликом кн̃жєни в Києвє на столЂ ωтца своєго Всєволода и устрои мост чєрєз ДнЂпръ.

В лЂто SХ̃ЛВ [6632] был пожар в Києвє, вєликии, згорЂло цр̃квєи єдных Х̃-сот [600] июня КГ̃ [23] дн̃я.

B лЂто SХ̃ЛГ [6633] прєставис Маномах Володимєр, кн̃жЂвъ у Києвє лЂт ГІ̃ [13], сЂл на кн̃жєни сн̃ъ єго старшии Имстислав ^Й.

В лЂто SХ̃ЛД [6634] заложиша цр̃квъ камєную Ст̃го Бориса и ГлЂба у Смолєнскую [!] на Смядинє.

В лЂто SХ̃ЧВ ⁵ [6692] Ростислав Мстиславович сЂлъ на вєликом кн̃жєни.

В лЂто SХ̃ξГ [6663] пошол Ростислав ко Смолєнску, а сн̃а своєго Ст̃ослава посадил в НовЂгородє, а Дв̃да в Новоторжку.

Того ж лЂта заложил кн̃зь Андрєи у Володимєри цр̃ков Ст̃ую Бц̃у ^К.

В лЂто SXO [6670] прєставис Ростислав Имстиславич, нарєчєнныи во ст̃ом кр̃щнии Михаило, внук Володимєров Маномахов, што Ст̃ую Бц̃у строил у Смолєнску, марта К̃А [21]; кнєжЂвъ у Києвє, лЂт Ф̃ [9] ^Л.

В лЂто SХ̃ОД [6674] взял Києв Имстислав ^М.

В лЂто SХ̃ПЕ [6685] кн̃зи поиманы были на побоищи Имстислав, Ярополкъ ωт ни[ж]них ⁶ и послєпили их, и ωтпустили. Ωны пришли к Смолєнску и увошли у цр̃ков Ст̃ых Мч̃ник Бориса и Глєба на Смєдынє и ту прозрЂя сє̃нбра во Ẽ [5] дн̃ъ. Пришли на зиму в Новгород, Имстислава посадиша на столЂ у сєбє, а брата его Ерополка на Новом Таржку.

В лЂто S̃Ψ [6700] знамениє явис вєликоє на нб̃си, нб̃о стало крываво и потєкло нб̃о во єдину нощ. И было чорно по зємли ж и по храмом всЂм чл̃ком зрящим яко кончина пришла, и видЂли яко кров полиянну по сснєгу [!].

В лЂто SΨ̃ВІ [6712] взяли Латына Цр̃ъград.

⁵ SXξB [6662] (ПСРЛ, т. 2, стб. 471).

⁶ Они же их ослЂпивши — taк у Волинському короткому літопису (ПСРЛ. — Т. 35. — С. 120).

B лЂто SΨ̃ЛВ [6732] былъ бои на Колкох ⁷ c Татары и убили кн̃зя Имстислава и с ним /663./ І̃ [10] кн̃зєи, Алєксадра [!] Поповича и с ним Ĩ [10] богатырєи и людєи бєз числа ^Н.

В лЂто SΨ̃ЛИ [6738] прєставис кн̃зь Имстислав Дв̃дович смолєнскии маия K̃ [20] ^О.

В лЂто SΩ̃МФ [6849] погорЂл Смолєнскъ на Сп̃сов дєн. Тои ж зымы вышол из Ωрды Товлубии, пущєн цр̃єм к Смолєнску и стоял много днєи, нє взял замку.

В лЂто SΩ̃П [6880] кн̃зь Михаило тфєрскии подвєл рат литовскую таино кн̃зя Кєстутия и АндрЂя полоцкого, Дмитрия друцкого и Витолта, иных кн̃зєи много. И взяли градов руских Е̃ [5]: Дмитров, Пєрєясловль, Кашин, Торжокъ, Любтєскъ. На трєтєє лЂто приходил кн̃зь Дмитрєи Иванович к Тфєри.

В лЂто SΩ̃ПЕ [6885] умєр в Литвє кн̃зь Ωлгердъ Гєдимонович.

В лЂто SΩ̃ЧЗ [6897] ^П взял Москву Тахтамыш. Яжє ⁸ ωтишол бєзбожныи Тахтамыш, приєхал кн̃зєи [!] Дмитрєи Иванович и видЂл град взят и люди посЂчєни и росказал тЂла мр̃твых хоронити, дал ωт P̃ [100] чл̃ков по рублю ωт погрєбания и зличили рублов Ф̃ [500]. А повєли у полон бєз числа. Сє ж быст за грєхи нш̃и.

⁷ Калка (суч. Кальчик) — притока р. Кальміус (Етимологічний словник... . — С. 65 — 66).

⁸ Літера є правлена.

В лЂто SΩ̃ЧД [6894] былас Литва и Смолняны под градом Имстиславлєм и убыли кн̃зя смолєн. Ст̃ослава и брата єго Ивана, и кн̃зя ГлЂба поимали.

Тои жъ зимы приходил кн̃зь Дмитрєи Иванович ратю к Новугороду.

В лЂто SΩ̃ЧИ [6898] сЂл на вєликом кн̃жєни Василєи Дмитрович ^Р.

Того ж лЂта был мор в Новєгородє.

В лЂто SЦ̃A [6901] сЂл на вєликом кн̃жєни кн̃зь Витовтъ Кєстутъєвич ^С.

В лЂто SЦ̃В [6002] кн̃зь Витовтъ литовскии взял град Смолєнскъ и намЂстники свои посадил, кн̃з жє Юрєи Ст̃ославович бєжал в Рєзан ^Т.

В лЂто SЦ̃З [6907] был бои Витовту з Тємирколтуєм цр̃єм за Тахтамыша цр̃я. Тємирколтуи убил Витовту ОД̃ [74] кн̃зєи, а воєвод и бояр литовских бєз числа. Был бои сєи августа за Ф̃ [500] вєрстъ за Києвом.

В лЂто SЦ̃Ф [6909] приняли смолянє кн̃зя своєго Юря Ст̃ославича /663зв./ на кн̃жєнє, a намЂстника Витовтова кн̃зя Ромона [!] брянского убили. Приходил кн̃зь Витовтъ co всєю силою литовскою ик Смолєнску и стоял под городом Д̃ [4] нд̃ли и ωтишол, мир взєм по старинЂ. А смолнянє ис кн̃зям [!] Юрємъ бояр своих побили, коториє пєревЂт дєржали к Витовту.

В лЂто SЦ̃ВІ [6912] приходил кн̃зь Витовтъ литовскии, а с ним кн̃зь Сємєн Ωлгєрдович и брат єго кнзь Швитригаило со всєю силою ко граду Смолєнску и стояли под градом Г̃ [3] мсц̃и, и нє взємши пошли.

В лЂто SЦ̃ГІ [6913] Витовтъ co Ωлгєрдовичом с Корибутом и з Логвином, Швитригпилом и со всэю силою пришол ко Смолєнску, а кн̃зь Юрєи затворился в городє со всими смолняны. Витовтъ жє всю вєсну стоял и с пушок бив, и нє взявши пошол, волостєм много зла сотворил. Кн̃з жє Юрєи сослас c кн̃зєм Василиєм смолєнским ⁹ и выєхал ис Смолєнска во малои дружинЂ, а княгиню свою и бояр ωставил у городє и приказя ждати сєбє на роки Г̃ [3], а caм поєхал на Москву и бил чолом кн̃зю Василю, просячи в нєго помощи. Кн̃з жє Василєи ωбєща єму дати свою ¹⁰ и удєржа єго на тыє роки, а наровил стю своєму Витов. Єгда жє быст кн̃зь Юрєи на Мо[сквє] ¹¹, а в то врємя Витовтъ собра силу и пришол к Смолєнску. Гражданє нє дождали кн̃зя Юря на роки, и, нє могущє тєрпЂти гладу и град Смолєнскъ прєдали Витовту. Сє ж быст послЂднєє плєнєниє Смолєнску ωт Витовта, у Пєтров Пост июня K̃S [26] взял град Смолєнскъ кн̃зь Витов [!], и всє кн̃жєнє смолєнскоє за сєбє побрал, и намЂстники свои у Смолєнску посадил, и ляхом прєдал дєржати ^У.

В лЂто SЦ̃КГ [6923] мс̃ца июня З̃ [7] дн̃я тма ¹² быст во Г̃ [3] час дн̃я.

Того ж лЂта Москва и Смолєнскъ погорЂл.

В лЂто SЦ̃ЛS [6936] был мор вєлми страшєн в Новєгородє.

В лЂто SЦ̃КЕ [6925] приходил Витовтъ /664./ к Новугороду ратю ^Ф.

В лЂто SЦ̃ЛЗ [6937] поставлєн митрополитом сщєнноинок Євфимєи ко Стои Софии.

В лЂто SЦ̃ЛИ [6938] умєр кн̃зь Витовтъ литовскии.

В лЂто SЦ̃ЛФ [6939] прєставис на Моск†митрополит Фотии.

В лЂто SЦ̃МА [6941] приєхал кн̃зєм Юрєи Сємєнович из Литовскои зємли в Новгород.

В лЂто SЦ̃МВ [6942] приєздил кн̃зь Василєи Василєвич в Новгород.

Того ж лЂта поставлєн был архиєпскопом у Вєликии Новгород сщн̃оинок Євфимєи митрополитом Гарасимом у Смолєнску при кн̃зи литовском Швитригаилє ^Х.

В лЂго SЦ̃МИ [6948] убиєн быст в ЛитвЂ. И посадили в Лит†на кн̃жєнии Казимєра королєвича, Якгаилова сн̃а.

Того ж лЂта выєхал з Города в Литву кн̃зь Юрєи. Кн̃зь литовскии подовал [!] єму ωтчину єго Смолєнскъ, ωн жє Смолєнскъ засЂл, потом убоявся и зєхал на Москву.

В лЂто SЦ̃МФ [6949] приходил кн̃зь Василєи Василєвич к Новугороду ратю.

В лЂто SЦ̃ξФ [6969| прєставис прєωсщ̃єнныи архиєпск̃пъ Вєликого Новагорода кир Євфимєи марта во АІ̃ [11] дн̃ь во Ф̃ [9] час нощи; пас цр̃квъ бжию лЂт КД̃ [24] и Е̃ [5] мсц̃єи, всих Л̃ [30] лЂт без єднаго ^Ц.

В лЂто SЦ̃ОА ^Ч [6971] попущєниєм бж̃иим взят быст Цр̃ьград цр̃єм турєцким маия КФ̃ [29] дн̃я.

В лЂто SЦ̃ЧА [6991] взят быст Києв ωт татар сєнтєбра.

В лЂто SЦ̃НФ [6959] мсца мая во И̃ [8] знамєни во А̃ [1]. во сл̃нцы дви части сизгибло ^Ш.

В лЂто ≠ξ̃ [7000] августа во КВ̃ [22] взят быст Смолєнскъ кн̃зєм московским Василєм Ивановичом зрадою смолєнских бояр.

⁹ московским?

¹⁰ Пропущене слово помощ.

¹¹ Слово недописане.

¹² Слово правлене.

Того ж рок[у] ¹³ бои был кн̃зю Констєнтину Ивановичу Ωстрозкому з Москвою под Ωршєю за Днєпром на Кропивнє рєцЂ. И побил кн̃зь Москвы АП̃ ¹⁴ на Рж̃ство Прст̃ыє Бц̃и, и цр̃ков там поставил Рж̃ство Прст̃ои Бц̃и ^Щ.

¹³ Слово недописане.

¹⁴ П [80 000], див. далі — це повідомлення повторюється.

КРОИНИКА Ω РОЗНЫХ РЄЧАХ, ТУТ НАИДЄШ ЧОГО ПОТРЄБА

/664зв./ Рок АТ̃ЧД [1394]: Боязокии цЂсар турєцкии, ωт Ямєрляна, цр̃я татарского, был поиманыи и в клЂтцє заикнєныи, и по Язии завжды был вожон, аж косткою рибєю сам задавився, абы соромоты ушол ^Ю

Того ж чс̃у Витовтъ стєршис c татары и колконадцєт гухвов татарских уворвавши и ωколо Вилни над рєкою Вакою ωсадил, гдЂ и тєпєр мєшкают.

Рок АТ̃ПS [1386]: Якгаило вилєнскии на кролєвство полскоє ωбран. Того ж чс̃у и кр̃щєн, и назван был Владислав.

Рок АУ̃МД [1444]: Владислав Г̃ [3]-и млад на кролєвство был взят Угорскоє ^Я. Ωн турки колко раз громил, на ωстаток у Варны звитязство ωдєржал. Кгды нєωпатрєнно турки угонял, и самого там забито.

Рок АУ̃Ч [1497]: волоховє на КузминЂ лЂсє поляков Буковиною много зрадливе поразили, а сам Жокгимонт [!], крол полскии, лєдво утєк.

Рок АФ̃ДІ [1514]: Жикгимонт, крол полскии, нємалоє воиско выправивши так з Литвы, як и с Полщи, до Вифлянт послал и ωных ку собЂ зголдовал, которыє под послушєнством и тєпєр кроля полского єст. Того ж рок[у] вєликии кн̃зь московскии Смолєнскъ ωблєг и ВІ̃ [12] н̃дль добывал, з дЂл стрєлял, которых мЂл ωколо трєхсот, и взял Смолєнскъ.

Рок АФ̃ЗІ [1517]: у Полщи и у Вєликом кн̃зьствє Литовском лютария почалас, которая и тєпєр триваєт.

Рок АФ̃ФІ [1519]: татарє c поляками зрадившис под Сакалєм на голову нш̃их поразили, а других в Бугу потопили.

Рок АФ̃К [1520]: Август, корол полскии, родился, а был коронован на кролєвство рок[у] АФ̃Л [1530]-го, и много рєчєи добрых постановивши у пою ¹ кролєвство рядил, и во КнышинЂ живота доконал рок[у] АФ̃ОВ [1572], мсц̃а июля Д̃ [4] дн̃я ^АА.

Рок АФ̃Л [1537]: Кокошая воина била, и ничого нє справили нигдЂ.

Рок АФ̃МВ [1542]: саранча была вєликая ². /665./

¹ покою

² Рядок викреслений червоним чорнилом.

Рок АФ̃ξ [1560]: моры вєликиє были у Полщи и в Подоли, и всєи Руси.

Рок АФ̃О [1570]: мороз жито поморозил в самы цвты [!], и был голод вєликии.

Рок АФ̃ОД [1574]: француж на кролєвство Полскоє коронован и нє умЂлъ им рядити, рыхло зас уєхал до Фрянции ^ББ.

Рок АФ̃ОЄ [1575]: татарє ω ст̃ои Покровє Подолє и Волын по самыи Илвовъ и Сакал вєлми звоевали, иж вся Полща боялас.

Рок АФ̃ОS [1576]: Стєфан, воєвода сєдмикгродскии, на кролєвство Полскоє взят и коронован.

Рок АФ̃ОЗ [1577]: нш̃и Кгданска добывали. Видячи кгданщанє, иж нє ωборонитис, доброволнє поддалис и кголдъ стародавныи знову поступили.

Рок АФ̃ОИ [1578]: Подкова, воєвода волоскии, доросши лЂт своих, низовых козаков набравши, Пєтрила, воєводу волоского, зогнал, а сам на воєводст†ωсЂл, за што уво Лвовє стяг ^ВВ

Рок АФ̃ОФ [1579]: Полоцско взял Стєфан корол c Поляки и з Литвою.

Рок АФ̃П [1580]: Луки Вєликиє нш̃и взяли.

Рок АФ̃ПА [1581]: Пскова нш̃и добывали и нє взємши поєдналис.

Рок АФ̃ПВ [1582]: папєж рымскии ст̃а ωт грєков ωтдєлил, в чом вєликоє замєшанє Поляком з Русю учинил.

Рок АФ̃ПЄ [1585]: вєликая ^2А и вєсна сухая, лЂто нєрожаиноє. Того ж рок[у] Бєлзь погорЂл в Мясп̃уст Вєликии.

Рок АФ̃ПИ [1588]: Максимилиян, цЂсар хр̃стиянскии, под Краков з вєликим людом притягнул был, хотячи королєм полскимъ быти, а коли ωт Кракова ωттягнул, под Бычиною покинулсє был и Г̃ [3] лЂта у вєзєню сєдєл. Того ж рок[у] и часу Жикгимонта Швєцкого на кролєвство Полскоє ωбрано и короновалсє.

Рок АФ̃ПФ [1589]: татаровє спаскиє Подолє сплюндровали.

Рок АФ̃ЧА [1591]: голод вєликии был на Подолє и в Pуси, по S̃ [6] золотых был корєц жита.

Pок АФ̃ЧЄ [1595]: татарє Подгорє и Покутє звоεвавши, чєрєз Бєскид до Угор пошли. /665зв./

Рок АФ̃ЧЄ [1595]: канслєр коронныи из жолнЂжєми полскими до Волох утягнувши, волохов под кроля полского подвєрнулъ и Вєрємия воєводу на них ωсадил.

Рок АФ̃ЧИ [1598]: штос было домы, костєлы, вєжи, цр̃кви попєрєписовало над домниманє людскоє. Того ж рок[у] быдло здыхало по Подолю у Руси.

Рок АФ̃ЧФ [1599] и X̃ [600]-го: на голову здихало.

Рок АХ̃-го [1600-го]: поляци з Мигалєм у Волосєх потрєбу мЂли и проиграли, а потом поправившис, Мигаля прогнали и зємлю Молтиянску под сєбє подбили.

Рок АС̃МА [1241]: татарє Подолє и Рус сплєндровавши, ко Судомиру и Завифвосту пришли и спалили. Крол Болєслав, рєчєнныи Пудикус ³, c Кракова до Угор утєкъ, а татаровє на дн̃ь Пасхи пришєдши, Краков спалили и до Слянска пришли, а под Враславлєм ⁴ вєрнулися, а другиє Вєликую Полщу воєвали. А так Гєндрик Пиус ⁵ у Лєкгници, люду нЂшто зобравши, c татарами зразился, нємало их погромил.

В тои час татарин указался ис чарами, кгдыж на корогви была написанна литєря такая ⁶, а навєрху голова чл̃чая з долгою бородою, которои з уст дым шкарєдныи и смродливыи выходил на наших. Зачим нш̃и зумЂвшис ωслабЂли, а татарє моц взяли и на голову нш̃их побили. А для личбы у каждого трупа ωдно ухо ωтрЂзовали, и так дєсят мєхов ушю нарЂзали.

^2А Пропущене слово зима?

³ Болеслав Сором'язливий.

⁴ Шльонськ і Вроцлав (суч. ПНР).

⁵ Гендрих Бородатий, опікун короля Болеслава Сором'язливого (1226 — 1279).

⁶ Далі в тексті пропуск, магічний знак не зображений.

Рок АС̃МИ [1248]: всє духовєнство ляхов поступили папєжу на Г̃ [3] лЂта пятую част своих доходов, абы им посту вєликого уменшил на д†нєдЂли, бо єго было Ф̃ [9] ндлъ на тот час.

Рок СξД [1264]: быдло вєликоє и малоє здыхало у Полщи.

Рок АТ̃ЧГ [1393]: Витовтъ, кн̃жа литовскоє, Ωрши и Витєбска на БЂлои Руси добил, и пустившис Києв и Житомир /666./ и Звинигород взял ⁷ под кн̃зєм Володимєром, сн̃ом Ст̃ополковым.

Рок ЦП̃І [989 — 990]: Рус кр̃стилася.

Рок Ц̃ξ-го [960-го]: Поляци кр̃стилис.

Рок АС̃МА [1241]: Батыи хр̃стиянство воєвалъ ^ГГ.

Рок АСОВ [1272]: Конисундис ⁸ кролєвая умєрла ^ДД.

Рок АУ̃Л [1430]: Витовтъ умєр.

Рок АУ̃ОЗ [1477]: Новгород Вєликии взялъ кн̃зь московскии за Казимєря короля ^ЕЕ.

Рок АУ̃ПІ [1489 — 1490]: кн̃жата сєвЂрскиє пєрєдалис на Москву ^ЄЄ.

Рок АУ̃ПЗ [1487]: Ωлбрєхтъ крол ωт Волох побит. Того ж року Алєксандро Брасльвлъ заложил ^ЖЖ.

Рок АФ̃З [1507]: татар кн̃зь Глинскии клєцкии побил.

Рок АФ̃И [1508]: Глинскии Забєринского ⁹ стял и втєк на Москву.

Рок АФ̃Ф [1509]: Псков московскии ¹⁰ взял ^ЗЗ.

Рок АФ̃ВІ [1512]: нши на Лопушном татар побили.

Рок АФ̃ДІ [1514]: Смолєнско московскии ¹¹ взял; того ж рок[у] нш̃и побили Москву на Ωрши.

Рок АФ̃SІ [1516]: нш̃и под Ωпочкою побиты.

Рок АФ̃І [1510]: нш̃и у Сакали ωт татар побиты.

Рок АФ̃КЗ [1527]: татар кнзь Костєнтин побил за Києвом.

Рок АФ̃ЛА [1531]: волохи у Обєртиня побиты.

Рок АФ̃ЛЄ [1535]: нш̃и Стародуб взяли.

Рок АФ̃МВ [1542]: была вєликая саранча.

Рок АФ̃МГ [1543]: чєтвєро двоє сл̃нца, двоє мсц̃а.

Рок АФ̃МИ [1548]: крол старыи умєр ^ИИ.

Рок АФ̃МФ [1549]: Пєрєдмирку татарє взяли.

Рок АФ̃Н [1550]: Браслявль ¹² татарє взяли.

Рок АФ̃ξГ [1563]: Полоцко взял московскии ¹¹.

Рок АФ̃ξД [1564]: битва Улская была, нш̃и Москву побили.

Рок АФ̃ξИ [1568]: Улы добывали. /666зв./

Рок АФ̃ОВ [1572]: Августъ король умєр ^ІІ.

Рок АФ̃ОГ [1573]: Гєндрик французы короновал у Краковє.

Рок АФ̃ОД [1574]: Гєндрик зєхав c кролєвства.

Рок АФ̃ОЄ [1575]: алєция ¹³ была у Стєнжици.

Рок АФ̃ОЄ [1575]: татарє были ωколо Илвова.

Рок АФ̃ОS [1576]: Стєфан на кролєвство коронованъ.

⁷ На другій половині слова чорнильна пляма.

⁸ Описка замість Конигундис.

⁸ Яна Юр'євича Заберезинського, намісника полоцького, воєводу троцького.

¹⁰ Пропущене слово; слід цар московскии.

¹¹ Пропущене слово; слід цар московскии.

¹² Літера я правлена.

¹³ Елекція; йдеться про елекційний сейм 12.1.1575 р., на якому обрано польським королем Стефана Баторія.

¹⁴ Описка замість Кгданская.

Рок АФ̃ОЗ [1577]: татарє Дубна добывали. Того ж рок[у] воина Кганская ¹⁴.

Рок АФ̃ОИ [1578]: татарє Ωстрога добывали, цр̃ь пєрєкопскии и цр̃євичи.

Рок АФ̃ОЗ [1577]: корол уво Лвовє казал стят Подкову ^ЇЇ.

Рок АФ̃ξФ [1569]: на короля Августа был такии голод вєликии, аж люди з голоду мєрли, а звлащє в Литвє и на Полєсю, а на Моск†єщє болшии был. В Литвє солянка жита по д†копы и по двадъцати грошєи литовских была. Был тот голод З [7] лЂт поспол, докончался рок[у] OS̃ [76], бо был такии мороз ωбъ Ωнофрии.

Рок АФ̃ОА [1571]: три дн̃и был тот мороз, которыи всє збожє ωзимоє и ярины побил, аж потом ωтросли потросє и ωтишли, алє вєлми плохи, так жє в мяцу Ωлыцкую по шєсти и по сєми копъ жита молочєно.

Рок АФ̃ОВ [1572]: по том голодє был мор вєликии на Волыни и в Подолю, и в ЛитвЂ, и мало нє всюды.

Рок АФ̃ОФ [1579]: августа КФ̃ [29] дн̃я Стєфан корол взял Полоцко. Того ж рок[у] ишол дождъ всє лЂто бєзпрєстани.

Рок АХ̃АІ [1611]: мсц̃а июня Г̃ [3] дн̃я крол Жикгимонт взял Смолєнскъ з нєдєли на понєдєлок.

Рок АХ̃ВІ [1612]: мсц̃а апрєля ФІ̃ [19] дн̃я на памєт прєподобнаго ωтца нш̃го Иωана ВЂтхия Лавры ωсвєщєнна быст цр̃ков Ст̃го Сп̃са и Ст̃го Пєтра и Ст̃го Николы у манастыри Мєжигорском архиєп̃скопом з КгрєцЂи, и много народу было /667./ з мЂста Києва и з иных мЂстъ.

Того ж рок[y] и того ж мсц̃а КГ̃ [23] дн̃я на дн̃ь ст̃го вєликомчн̃ка Гєωргия тои жє архиєп̃скопъ ωс̃тил цр̃ков Ст̃ои Троици, в нєи жє придєл ст̃го Кирила при игумєнє ωтцу Василии Красовском, прозываємом Чорнобровцє.

Рок АХ̃ДІ [1614]: мсц̃а фєвраля KЗ̃ [27] дн̃я ис чєтвєрга на пятницу на памєт ст̃го ωтца Василия прєставис тои ωц̃ъ игумєн Василєи, а погрєбли єго марта во Г̃ [3] дн̃ь на Сырнои нєдєли, и положили тЂло єго чєстноє под муром подлє правого крилоса под стєною со чєстию вєликою.

Рок АХ̃ЄІ [1615]: мсц̃а июня ДІ̃ [14] дн̃я ис сєрєды на чєтвєр у Пєчєрском манастыри у цр̃кви зостался злодєи, хотячи покрасти цр̃ков ає [!?] ув олтари, и скрився, взял из жєртовника срєбряныи котєлєц и иныє сосуды побрал, и за пазуху заклал. И пошол з олтаря до ωбраза Пр̃стои Бц̃ы, хотячи ωборвати килко чирвоных было там на ωбразє, алє нЂякая бж̃єствєнная нєвидимая сила возбрани єму, килко раз ударило єго ω зємлю, ωт ωбраза єлико хотЂл — пач єго било. И так ушєдши ув олтар и ωцєпєнЂвши, лєжал под пєкєлком, гдє ωгон дєржат, аж єго панамар на заутрєи нашол. И так ωныи злочєстивыи всє исповєдал, штос над ним чинило.

Рок АХ̃ГІ [1613]: мсц̃а ноября Г̃ [3] дн̃я на памєт Ст̃ых: мч̃нкъ Акипиксимы ^ЙЙ и прозвитєра Иωсифа гром гримєв и дожды [!] был силныи из вєликим страхом на З̃І [17] годинє.

Рок АХ̃И [1608]: мсц̃а фєвраля Г̃ [3] дн̃я прєставис бл̃говЂрныи и христолюбивыи кн̃зь Василєи Ωстрозкии, воєвода києвскии, которыи насЂял всєлєнную всю ст̃ыми книгами. Лежит тЂло єго ув ОстрозЂ у цр̃кви Ст̃го Бг̃оявлєния, жил на свЂтє лЂт ПВ̃ [82] ¹⁵ /667зв./

Ω ЦРКВИ СОБОРНОИ, ИЖ ЄСТ В КИЄВЄ, СТОИТ НА МЂСТЄ, ЯК ПОПРАВЛЄНА НА СТАРОМ ФУДАМЄНТЄ

А пєрвого початку старого нигдЂ у кроиниках нє ωбрєтохом, токмо сєи антиминс на том жє прєстолє старом сицє подписаныи: «Ωсвєтис ωлтар вєликого бг̃а и сп̃са ншго Исс̃а Хса̃, прєст̃ыя Бц̃а чст̃ного єя УспЂния прєωсвєщєнным архиєпскомъ и митрополитом києвским и всєя Руси Мисаилом при вєликом короли Казимєри, и положон быст здЂ в лЂто SЦ̃А [1393] индикта S̃-го [6-го] марта Л̃ [30] дн̃я на памєт прп̃дбнаго ωтца нш̃го Иωана ЛЂствичника».

Ω ПОПРАВЄ НА СТАРОМ ФУДАМЄНТЄ

Из обычного всємогущаго мл̃срдия сп̃ситєля н̃шго бг̃а, наипачє жє нн̃Ђ за нш̃их родов посєти нас бл̃дтию своєю, ащє и мало что ωт нш̃их исправлєнии, но помошъ и мл̃твы ст̃ых дрєвних бг̃оносных ω̃ц ω нас дЂиствоваша ко бг̃у и нш̃є прошєниє нє быст тощно. За фартунного панованя наяснЂишого гсд̃ря и вєликого короля нш̃го Жигимонта, а за дєржаниє воєводства Києвского вєлможного єго мл̃сти пн̃а Станислава Жолковского, а во ωтступлєнии митрополитов києвских вдовствующи митрополии Києвскои, понєж ωни вси уклонишас во купє ко Западу, мы ж ωных мєрзостъ вознєнавидЂвшє, наслаждаємся пророчєских словєс: «Ωт Сиωна изыидє закон и слово гд̃нє из Єр̃слма, а нє з Рима». В то ж врємя во ωсвєщєнных кир патриярха констєнтинополского Тимофєя, а здЂ во бг̃оспс̃аємом градє Києвє всих ωбщє живущих православных християн пр̃сных во вЂрє, наипачє ж пн̃а воита Дєωнисия Балыки, а по нєм наставлъшєго [!] воита Фєωдора Ходыки, а за бурмистра /668./ пн̃а Сызона, сн̃а того жъ воита Балыки.

Рок АХ̃ГІ [1613]: мсц̃а апрєля ЄІ̃ [15] дн̃я на памєт ст̃ых ап̃слъ Трофима Пуда, Аристарха за привилиєм ¹⁶ наяснЂишого гд̃ря нш̃го вєликого короля Жикгмонта, а за бл̃гословєниєм выш мєнєннаго патриярхи Тимофея почали c фудамєнту поправлят цр̃ков Ст̃ои Пр̃чстоє УспЂниє соборную, стоячую в рынку мЂстє Києвском, внутри и знадворя, бо ωшарпалася была вєлми и розвалялас, вєрху всєго нє было. Старыи мур по вышниє ωкна вєс вєрхь збивали и знову муровали, самую баню и тыє Д̃ [4] бани ωколо знову робили, бо прєжде тых малых бан нє было, толко было дошчъками покрыто. А поправлял тую цр̃ков маистръ зє Влох Савостиян Брану ^КК, почал мсц̃а мая ГІ̃ [13] дн̃я на Возносєниє Гсд̃нє. Выношєно всє из цр̃квы и вси ωбрады цр̃ковныє. Почали ис сєрєдыны робити зысподу и заробили болшую баню мсц̃а сєнтєбря Д̃ [4] дн̃я на памєт ст̃го мч̃нка Вавилы.

¹⁵ Далі на вільній частині рядка дописано почерком XVIII ст.: Року АХ̃Г [1603] ишла саранча мсца аугуста S [6].

¹⁶ Перша літера и правлена.

Того ж мсц̃а КИ̃ [28] дн̃я у вовторок поставили кр̃сть на цр̃кви тои ж таки, што и прєждє был, алє позлотили знову. Мсц̃а ωктєбря А̃ [1] дня домуровали и ωстатнєи бани на рогу ωт урмянскоє цр̃кви. Того жъ року дєкабря Є̃ [5] дн̃я на памєт пр̃пдбнаго ωтца Савы почали служит всєнощноє и службу бж̃ию, и служили прєз всю зиму, жє нЂлзє было зимою робит маистром аж до ндл̃и Мироносиц. И ωпят вси ωбрады были выношєны до Воскрєсєния Хсв̃а цр̃кви ¹⁷, и прєз тоє лЂто робили, и доробили за помочю бж̃иєю мсц̃а августа ДІ̃ [14] дн̃я, и ωбразы постановили, и почали служити аж и до днєс. Ωбрєтохом в кроиницє, иж пєрвЂи того сия бж̃ствєнная цр̃ков была изнищона, всє побрано срєбро и злато, кр̃сты и иконы полуплєны, /668зв./ и попалєно всє ωт поганого цр̃я пєрєкопского Мєнди-Курия ¹⁸ и ωт нєч̃стивых єго агарян року ¹⁹. A был приставом и дозорцою до тои роботы пан Сызон Балыка, упрошоныи ωт всєпо ²⁰ мЂста. Да нє возмни нихто сих слов ложю, но вЂруи, истинна бо єст всє, и аз, нєдостоиныи во иєрєωх Кирило Иванович, на тот час будучи мнЂ уставником при тои цр̃кви, ωглєдах всє ωчима своими и написах достовЂрно.

А сама цр̃ков увышки ωт зємли до самого вєрху болшєи бани Л̃ [30] локот и Г̃ [3] локти и чвєрть локтя.

А в то врємя в том жє бгоспасаємом градє Києвє быша служитєли ст̃ых цр̃квєи Василєи матєрєбозкии, Мина притискии, Иωан воскрєсєнскии, Никита спаскии, Климєнтєи набєрєзскии, Михаило борисоглЂбскии, Климєнтєи рж̃єствєнскии, Матфєи добрыковскии ²¹ и диякон Дємян. А вси тыє вышєи мєнєнныє свєщєники каждыи нд̃лю свою служили в тои цр̃кви соборнои Ст̃ои Пр̃чстоє, за гд̃ря коря ²² га̃ бг̃а просили и за пн̃а воєводу києвского, и за всих православных християн. A ωны за тоє ωт гсд̃ря короля и ωт пн̃а воєводы києвского, и за всих православных християн ²³ и намЂстников єго тым были пожалованы, жє во вшєляком покою на тот час мєшкали ωт вшєляких ²⁴ подачок и ωт постоєв так ωколичных, яко и от самого пн̃а воєводы.

Року АХ̃Ф [1609] пан Жолковскии, гєтман Вєликого кн̃зства Литовского ^ЛЛ, наєхал на воєводство Києвскоє. Того ж року и Ст̃ая София цр̃ков ωстала ωт службы, нє почали свєщєники до нєи со крєсты ходити и службы бж̃иєи ωтправовати прєто, иж митрополит Ипатии приступил до костєла рымского и казал был там свєщєником києвским за сєбє бг̃а просити, за што и сам злє живота доконал у Володимєри, позвал попов мандатом ²⁵ на трибунал, да сам и справ своих /669./ нє побрал. А прєд ним был митрополит Михаило Рагаза, тот началник тои болєсты. Напєрвєи прислал тут до Києва врядника своєго имєнєм Ян Хрушинскии, щырии лях, чого николи нє бывало, которыи задовал ²⁶ трудност попом ω послушєнство.

¹⁷ Тобто, до Воскресенської церкви.

¹⁸ Менглі-Гірея.

¹⁹ Далі в тексті пропуск, дата не проставлена.

²⁰ всєго

²¹ добрыниколскии?

²² короля

²³ Слово закреслене.

²¹ Літера я правлена.

²⁵ Літера м правлена.

²⁰ задавал

Тєды и того явнє бг̃ъ скарал: жєна єго сытила мєд ко Рж̃ству Бц̃и, хотЂла мЂт попов в сєбє на ωбЂдє и мЂла сполєчностъ показуват костєла рымского ис цр̃ков восточною. Алє нє допустил котєл:

Пришла до нєго сыты глєдЂти,

мусєла в нєм и долго сєдЂти,

аж и ωчы єи нє почали глєдЂти,

так и тои дал покои etc.

Рок АФ̃ЧВ [1592]: козаки Пєрєясловлє спалили.

Рок АФ̃ЧS [1596]: табурщина была на казоки [!] за Пєрєясловлєм на полис (?!).

Рок АФ̃ПФ [1589]: татарє спаскиє под Збарожом кошєм стояли и Струса под Бавором забили. Тогды кн̃зь Констянтин Василєи, воєвода києвскии, заложыл мЂсто Пєрєясловлє на старом сєлищи ^ММ.

Рок АФ̃ЧГ [1593]: тот жє кн̃зь Василєи под Пяткою козаков побил, и присягли єму козаки, жє вЂчными часы з ним нє валчыт. И на знак того звитяства казал накидат Г̃ [3] ямы вєликих и казал насыпати над ними Г̃ [3] курганы вєликих, которыє и тєпєр стоят ^НН.

Рок АФ̃Н [1508]: кн̃зя Констєнтина Ωстрозского, воєводу троцкого, на Вєхроси из иншими литовскими пн̃ами Москва поимала, и сєдЂл на самои столици З̃ [7] лЂтъ ^ОО.

Рок АФ̃КЗ̃ [1527]: кн̃зь Констянтин из иншими пн̃ами литовскими побил татар за Києвом на Ωлшаници рєцЂ П̃ [80] тисєчєи.

Рок АФ̃Ф [1509]: тот жє Констєнтин на Кропивнє рєцЂ Москву побил П̃ [80] тисєчєи на дн̃ь Рж̃ства Прєс̃тыє Бц̃и и цр̃ков там казал поставити.

Рок SХ̃Д [6604]: пришєдши Ωшємак ²⁷ c погаными агаряны извоєвал Києв и всє мЂсто спалил и манастыр Пєчєрскии.

Рок АУ̃ПЗ [1487]: кн̃зь Алєксандръ Констянтинович, /669зв./ сн̃ъ воєводы києвского, заложил мЂсто и замок Брасловлъ ^ПП.

Рок АФ̃ОS [1576]: Ωстропол заложєн.

Рок АФ̃ПЄ [1585]: кнзь воєвода києвскии Ярославлъ заложил.

Рок АУ̃НА [1451]: Цръгор и Кгрєцию турци взяли ^РР.

Рок АУ̃ПФ [1489] ²⁸.

Рок АУ̃НА [1451]: Црьгород и Кгрєцию турци взяли ²⁸.

²⁷ Боняк (так у ПСРЛ. — Т. 1, стб. 231; т. 2, стб. 221).

²⁸ Рядок закреслений.

Року АУ̃ПФ [1489]: Иєр̃слмъ турци взєли ^СС.

Рок АХ̃SІ [1616]: при вєликом короли Августє а при пн̃у воєводє києвскомъ Жолковскомъ Станиславє стараниєм и накладом пн̃ов мєщан києвских, на тот час пн̃а воита Фєωдора Ходыки и пн̃а бурмистра Матфєя Мачохи, и всєго посполства мст̃а Києвского скопали гору Уздыхалницу, которая стоит прєд замкомъ Києвскимъ, и єщє знат, а скопано єи полшєста сажня добрых увышки. И нашли там пєчєрку сажнєи Г̃-х [3-х] угору глубоко, а вшир сажня. И нашли в нєи горщикъ ни щим, а болшєи ничого. И написанно стєнЂ имя «Павєл», знат, жє то колис. /670./

Рок АХ̃Д [1604]: при вєликом короли Жикгимонтє а при водє [!] києвском кн̃зи Василии Ωстрозском ωказался якиисъ цар, пєршєи был в Пєчєрском манастыри чєрнцомъ, полрока нихто εго нє знал. А пришол з Волыни, нє знат ωткул. Потом пошол до кн̃зя Адама Вишнєвєцкого до Брягиня, там жє скидал платиє чєрнєцкоє. Кн̃зь Адам ωздобил єго по-царску уборами и прославил εго цр̃єм московскимъ, и удал εго до кроля Августа. Крол му додавши вЂры пустил εго на Москву и при нєм пустил воєводу синацкого, пн̃а сондомирского и пна Ратомского, старосту ωстрицкого ^ТТ, иных пн̃ов много. Которыи ишол гоинє яко цар. Пристовало [!] до нєго панства много. Пришол до Києва ωктєбря З̃ [7] дн̃я, был в Києвє д†нд̃ли, стоял у Митковича бурмистра, пошол на Вышшєгород и шол до Путивля. Вышол c Путивля маия Г̃ [3], X̃E [1605] року. Того ж сЂлъ на цр̃ст†и коронован заразом. А за якимсъ забурєниєм забыто εго рок[y] АХ̃S [1606], маия Ф̃ [9] дн̃я ^{29 УУ};

²⁹ Тут закінчується текст першого літописця (почерк I).

Року АХ̃І [1610] знову ωдозвалсε тот жε Дмитръ Иванович, цар московъскии. Скупивши воиска полского, котороε зобрано было на рокош против εго кр. мл. тεпεрεшнєго Жикмонта Трεтεго, вторгнулъ до зεмли Московскоε под Навагородом, маючи поляков тисεчεи І̃ [10], над которым воискомъ полским был старшимъ гεтманом пан Мεховицкии. Потом Шуискии, цар московскии, зо всεго царства своεго скупил люду воεнного напротивко цр̃я Дмитра Ивановича тисεчεи Р̃П [180], при котором воиску был старшим брат цр̃я Шуиского. При цару тεж Дмитру по пн̃у Мεхεвицком был гεтманом княз Роман Ружинскии. На тот час воиска нашого, поляков, козаков запорозских так тεж и донцов, всεго было тисεчεи EІ̃ [15]. Споткалсε княз Ружинскии з братом цря Шуиского /670зв./ под мεстом Болховом, и поражεна εст Москва прεз поляковъ, козаковъ и донцов, гдε воεвода болховскии сам из мεстом и з замком царεви Дмитру поддал. Цр̃я жε Шуиского брат з остатком воиска своεго вшол под столицу и положилсε з воиском ωт столици полмили над рεчкою Ходынкою, a цр̃ъ Дмитръ c князεм Ружинским, притεгнувши над рεку Москву и Тушин, положилсε з воиском ωт столици мил полторы. Там жε вночи кияз Ружинскии c поляками з розных сторон ударили на табор Шуиского и розгромил табор, здобыч нεмалую ωдεржалъ. Хоч троха столици Москву посилковано, алε цар Шуискии болεи ³⁰ табором нε стал, замкнувшисε з людом до столици, и болεи в поли битвы нε смεл чинит. Зачим поляки под моц всε царство Московскоε, ωкром столици и мεста Смолεнского, всε ωпановали и мεли то в моци своεи лεт Г̃ [3]. Потом Шуискии бачεчи, иж c царства Московского ωтпору поляком дати нε мог, выправил Скопина, давши му дεнεг килка сот рублεи, до Вεликого Новагорода, а ωттул до Нεмεц, затεгаючи нεмцов, гдε затεгнул воиска нεмεцкого пεхоты и εзды тисεчεи І̃ [10]. /671./ В том жε часε εго кр. мл. тεпεрεшнии Жикгимонт Трεтии Смолεнского замку добыл и воиско Скопиново знεс. Жолнεром тεж, которыε цр̃у Дмитру служили, заслужεноε поднял платит, якож за конфεдарациεю ωт жолнεров заслужεноε жолънεромъ дошло. Цар Дмитръ видεчи, жε εго воиско полскоε ωтступило, в малом воиску з донцами до Калуги з Руцким ωт столици ωдышолъ. Там жε сын цр̃я касимовского татарин в поли, мстεчисε забитя ωтца своεго, ωного цр̃я Дмитра забил. Потом Руцкии царεвую Дмитрову за сεбε взял c потомком, сыном цр̃я Дмитра. Потом Москва ωного Руцкого добыла и на косы въ яму живого вкинула, а сына цр̃я Дмитрова на шолковом шнурε ωбεсили, самую тεж царεвую до манастыра Покровы Пр̃свєто [!] Бц̃и и мεстε Суздолю постригли. А с королєм εго мл. Жикмонтом Трεтим примирε учинили на чотырнадцат лεт, поступивши князство Смолεнскоε и Чεрниговскоε зо вими мεстами сивми ³¹ приналεглыми в року идучом АХ̃К [1620]. Ω чом ширεи ω воинε Московскои, которая тривала в зεмли тои мало нε двадцат лεт, читεлник наидε у кроницε полскои, которая в рихлом часε выдана бу[дεт] ³², ωтсылаю, а чого-м был ωт лεт Г̃ [3] у тои зεмли свεдом, то-м коротко написаль. /671зв./

³⁰ Слово повторене двічі, перший варіант закреслений.

³¹ всими? своими?

³² Слово правлене.